Özil hefur búið til fleiri dauðafæri en allt Chelsea-liðið

Mesut Özil hefur verið magnaður með toppliði Arsenal í ensku úrvalsdeildinni á þessu tímabil og hann bæði skoraði og gaf stoðsendingu í í 2-0 sigri á Bournemouth í gærkvöldi í síðasta deildarleik Arsenal-liðsins á árinu 2015.

Özil gaf sína sextándu stoðsendingu þegar hann lagði upp fyrra mark Arsenal fyrir Gabriel Paulista og vantar aðeins fjórar stoðsendingar til að jafna stoðsendingamet Thierry Henry frá 2002-03.

Mesut Özil átti frábæran leik á móti Bournemouth og bjó alls til níu skotfæri í leiknum þar af voru fimm þeirra dauðafæri. Þetta er það mesta hjá einum leikmanni í einum leik á þessu tímabili samkvæmt frétt á Sky Sports. Sky Sports tók líka saman fleiri tölur um það hvernig  Özil hefur spilað uppi samherjana á þessu tímabili.

Özil hefur gefið tvöfalt fleiri stoðsendingar en næsti maður á listanum sem er Kevin de Bruyne hjá Manchester City. Kevin de Bruyne gæti minnkað forskotið í leiknum á móti Leicester í kvöld.

Özil hefur alls skapað 80 skotfæri fyrir félaga sína á tímabilinu eða 30 fleiri færi en næsti maður sem er Dusan Tadic hjá Southampton.

Özil hefur ennfremur búið til 21 dauðafæri fyrir félaga sína en næsti maður á þeim lista er Riyad Mahrez hjá Leicester City með 12 slíkar sendingar. Özil hefur skapað fleiri dauðafæri en allir leikmenn hjá sex félögum. Eitt af þessum sex félögum eru ríkjandi Englandsmeistarar Chelsea.

Özil langefstur á öllum listum í ensku úrvalsdeildinni (Tekið saman af Sky Sports):

Flestar stoðsendingar 2015/16

Mesut Özil, Arsenal     16

Kevin de Bruyne, Man City     8

Riyad Mahrez, Leicester City     7

David Silva, Man City     7

Gerard Deulofeu, Everton     7

Ross Barkley, Everton     7

Flest sköpuð skotfæri 2015/16

Mesut Özil, Arsenal     80

Dusan Tadic, Southampton     50

Kevin de Bruyne, Man City     48

Dimitri Payet, West Ham     47

Christian Eriksen, Tottenham     47

Flest sköpuð dauðafæri 2015/16

Mesut Özil, Arsenal     21

Riyad Mahrez, Leicester City     12

Hector Bellerin, Arsenal     8

Sadio Mane, Southampton     8

Moussa Sissoko, Newcastle     8