Aron Einar skoraði í jafntefli

Landsliðsfyrirliðinn Aron Einar Gunnarsson var á skotskónum þegar Cardiff gerði 1-1 jafntefli við Nottingham Forest í ensku B-deildinni í kvöld.

Oliver Burke kom Forest yfir á níundu mínútu en Aron Einar náði að jafna metin aðeins fjórum mínútum síðar er skot hans breytti um stefnu á varnarmanni.

Cardiff stjórnaði leiknum á löngum köflum en náði ekki að knýja fram sigur gegn seigu liði Forest sem hefur nú ekki tapað í sjö leikjum í röð. Cardiff er nú í tíunda sæti deildarinnar en Forest er í því fjórtánda.

Aron Einar fékk færi til að skora öðru sinni í leiknum en skallaði framhjá í síðari hálfleik. Hann var svo tekinn af velli á 70. mínútu.