Ensku liðin fá meiri sjónvarpstekjur en lið í efstu deildum 48 landa í Evrópu

Enska úrvalsdeildin er svo langt á undan öðrum deildum Evrópu þegar kemur að sjónvarpstekjum að liðin 20 í henni fá meira en lið í efstu deildum 48 annarra deilda álfunnar til samans.

Þetta kemur fram í skýrslu knattspyrnusambands Evrópu um fjármál innan fótboltans, en það er Daily Mail sem greinir frá.

Sjá einnig:Mörkin hans Falcao á Englandi hafa kostað 513 milljónir stykkið

Liðin 20 í ensku úrvalsdeildinni fá samtals meira en 597 lið í efstu deildum 48 landa í Evrópu, en liðin í Pepsi-deildinni eru þar á meðal. Um er að ræða allar efstu deildir álfunnar utan Þýskalands, ítalíu, Spánar, Frakklands og Rússlands.

„Til að setja þetta í samhengi þá eru innan þessara 48 deilda 20 mismunandi lið sem hafa unnið Evróputitla,“ segir í skýrslunni.

Þar má nefna lið eins og Benfica og Porto frá Portúgal, Ajax, PSV og Feyenoord frá Hollandi, Steaua Búkarest frá Rúmeníu og Celtic frá Skotlandi. Þessi lið í dag og löndin sem þau spila í eru ekki lengur samkeppnishæf við ensku úrvalsdeildina þegar kemur að peningum.

Stærsti hluti sjónvarpsteknanna á Englandi kemur í gegnum ensku úrvalsdeildina, en ensku liðin fá samtals 3,3 milljarða punda sem er töluvert meira en liðin í hinum stóru deildunum.

Þýsku liðin skiptu á milli sín 1,8 milljarði punda á síðustu leiktíð, þau spænsku 1,7 milljarði, ítölsku 1,4 milljarði og þau frönsku 1,3 milljarði punda.

Þetta gerir það að verkum að liðin í ensku úrvalsdeildinni geta borgað lang hæstu launin, en launakostnaður deildarinnar var 1,9 milljarður punda í lok árs 2014.