David Silva fór meiddur af velli í gær

Forráðamenn Manchester City eru eflaust ekkert of sáttir eftir að David Silva, leikmaður liðsins, fór meiddur af velli í leik spænska landsliðsins gegn Lúxemborg í gær.

Fór Silva meiddur af velli tæplega sólarhring eftir að Sergio Agüero, framherji Manchester City, fór meiddur af velli í leik með argentínska landsliðinu.

Silva hefur verið lykilmaður í sóknarleik Manchester City allt frá því að hann gekk til liðs við enska félagið frá Valencia sumarið 2010 en hann lék aðeins 11. mínútur í 4-0 sigri Spánverja í kvöld.

Mátti Manuel Pellegrini alls ekki við því að missa annan lykilleikmann úr sóknarleik liðsins eftir að hafa séð Sergio Aguero borinn af velli eftir 20. mínútur í leik Argentínu og Ekvador kvöldið áður.

Silva var ekki eini leikmaðurinn sem fór meiddur útaf í gærkvöld en Alvaro Morata, framherji Juventus, óskaði einnig eftir skiptingu í fyrri hálfleik vegna meiðsla.

Þrátt fyrir að hafa misst tvo leikmenn af velli í fyrri hálfleik vegna meiðsla tókst spænska liðinu að tryggja sér sæti á EM með öruggum 4-0 sigri á Lúxemborg.