Kompany komst heill í gegnum landsleikinn

Vincent Kompany spilaði með belgíska landsliðinu í gær gegn Ísrael í óþökk félags hans, Man. City.

Kompany hefur misst af fimm síðustu leikjum City en var samt kallaður í landsliðshópinn. Hann hvíldi í fyrri leiki Belga en spilaði í 57 mínútur í sigrinum á Ísrael.

Hann komst óskaddaður í gegnum leikinn og sagði gott að hafa spilað.

„Mér líður frábærlega og er ánægður að hafa spilað. Það er gott að vera kominn aftur á lappir og ég bíð spenntur eftir næstu leikjum," sagði Kompany.

„Ég þurfti á þessu að halda. Ég er alltaf stoltur af því að spila fyrir mína þjóð."

Frábær árangur Belga í undankeppninni hefur gert það að verkum að þeir verða í efsta sætinu á næsta FIFA-lista.