Mourinho fékk bann og sekt

Jose Mourinho mun ekki geta stýrt liði Chelsea um helgina í ensku úrvalsdeildinni.

Það er búið að dæma hann í eins leiks bann og sekta hann einnig um tæpar 10 milljónir króna fyrir ummæli sem hann lét falla eftir leik síns liðs gegn Southampton í byrjun mánaðarins.

Mourinho sagði eftir leikinn að dómarar ættu erfitt með að dæma á andstæðinga Chelsea og það væri að særa liðið.

„Ef enska knattspyrnusambandið vill refsa mér fyrir þessi ummæli þá mega þeir gera það. Þeir refsa ekki öðrum stjórum, aðeins mér. Það truflar mig ekki," sagði Portúgalinn sem var heldur betur tekinn á orðinu.