Wijnaldum með fernu í fyrsta sigri Newcastle

Georginio Wijnaldum skoraði fernu þegar Newcastle vann sinn fyrsta sigur í ensku úrvalsdeildinni á tímabilinu. Lærisveinar Steve McClaren lögðu þá Norwich að velli, 6-2, í bráðskemmtilegum leik.

Með sigrinum komst Newcastle upp í 18. sæti deildarinnar en liðið er nú tveimur stigum frá öruggu sæti.

Fyrir leikinn í dag var Newcastle búið að skora sex mörk í fyrstu átta deildarleikjum sínum en liðið tvöfaldaði þann markafjölda í dag.

Wijnadum kom Newcastle yfir á 14. mínútu eftir sendingu frá Moussa Sissoko en hann lagði upp þrjú mörk í dag.

Dieumerci Mbokani jafnaði metin á 20. mínútu en sex mínútum síðar var Wijnaldum aftur á ferðinni þegar hann skallaði fyrirgjöf Sissoko í netið.

Ayoze Pérez kom Newcastle í 3-1 á 33. mínútu en aðeins mínútu síðar minnkaði Nathan Redmond muninn.

Staðan var 3-2 í hálfleik og allt fram á 64. mínútu þegar serbneski framherjinn Aleksandar Mitrovic skoraði frábært mark eftir sendingu Sissoko.

Tveimur mínútum síðar fullkomnaði Wijnaldum þrennuna með öðru skallamarki, nú eftir sendingu frá Daryl Janmaat, og hann skoraði svo sitt fjórða mark á 85. mínútu þegar skot hans fyrir utan teig fór í varnarmann og yfir John Ruddy, markvörð Norwich.