Ancelotti reiknar með að Mourinho verði áfram

Carlo Ancelotti, sem var rekinn sem stjóri Real Madrid í sumar, reiknar með því að taka sér alls eins árs frí frá knattspyrnunni.

Ancelotti er þaulreyndur Ítali, 56 ára gamall,  og var á dögunum orðaður við starf knattspyrnustjóra Liverpool.

Talið er að forráðamenn Liverpool hafi sett sig í samband við Ancelotti en hann gefið afsvar um leið.

Ancelotti var áður stjóri Chelsea og varð liðið enskur meistari og bikarmeistari árið 2010. Hann var rekinn ári síðan. Jose Mourinho er nú stjóri liðsins en því hefur gengið illa í haust.

Ancelotti reiknar þó með því að Mourinho fari hvergi. „Ég tel ekki að Chelsea vilji breyta til. Í öllu falli er það enn áætlun mín að vera í fríi í eitt ár.“

Honum bauðst að taka við sínu gamla félagi, AC Milan, síðastliðið sumar en hafnaði því. „Það tekur á að þjálfa Real Madrid og þetta voru tvö afar krefjandi ár,“ sagði Ancelotti sem sagðist hafa verið orkulaus í sumar.

„Ég er að enduruppgötva kosti þess að vera venjuleg manneskja. Maður lifir betra lífi án stöðugrar pressu.“