Mourinho myndi taka við öllum leikmönnum Arsenal

Jose Mourinho, knattspyrnustjóri Chelsea, skaut föstum skotum að kollega sínum hjá Arsenal, Arsene Wenger, eftir leik liðanna um helgina.

Sagðist hann ekki skilja hvernig Arsenal hefði ekki orðið meistari í jafn langan tíma og raun ber vitni því leikmannahópur liðsins væri nægilega góður til að berjast um titilinn.

Hefur Wenger verið töluvert gagnrýndur undanfarin ár en Arsenal varð síðast enskur meistari árið 2004. Á sama tíma hefur Chelsea orðið fjórum sinnum meistari, þar af í þrígang undir stjórn Mourinho.

„Að mínu mati er leikmannahópur Arsenal nægilega sterkur til þess að félagið geti unnið titilinn en mér finnst það á hverju ári. Ég skil ekki afhverju það er svona langt síðan félagið varð enskur meistari, það er enginn veikur hlekkur í liðinu. Ég myndi taka við hvaða leikmanni sem er frá Arsenal.“