Hitafundur í ráðhúsinu: „Þessu máli er lokið“

„Þessu máli er lokið,“ sagði Dagur B. Eggertsson borgarstjóri á aukafundi borgarstjórnar rétt í þessu þar sem verið er að ræða afturköllun tillögu borgarstjórnar um viðskiptaþvinganir gagnvart Ísraelsríki.

Dagur segir tillöguna dregna til baka með fullu en að á fundinum í dag megi ekki senda þau skilaboð að Reykjavík standi ekki með mannréttindamálum.

Kjartan Magnússon, borgarfulltrúi Sjálfstæðismanna, kallaði á fundinum eftir afsögn Dags sem borgarstjóra vegna þess skaða sem samþykkt tillögunar hefði þegar valdið.

„Borgarstjóri á að lágmarka tjónið og segja af sér,“ sagði Kjartan og uppskar mikið lófaklapp frá áhorfendum en fjöldi manns er komin saman til að fylgjast með fundinum og mótmæla samþykkt tillögunnar.