Wenger missti af Martial

Philippe Lamboley, umboðsmaður Anthony Martial, Frakkans unga sem hefur slegið í fyrstu leikjum sínum fyrir Manchester United, segir að Arsene Wenger hafi gefið frá sér Martial því hann taldi leikmanninn vera meiri kantmann en framherja.

Martial fer frábærlega af stað með Manchester United, en þessi 19 ára gamli strákur er búin að skora fjögur mörk í fyrstu þremur leikjum sínum fyrir liðið.

Hann er búinn að skora á 56 mínútna fresti í leikjum gegn Liverpool og Southampton í deildinni og svo Ipswich í deildabikarnum.

Arsene Wenger, knattspyrnustjóri Arsenal, hefur áður sagst vita allt um drenginn þar sem hann hefur fylgst með honum frá unga aldri. Hann reyndi þó aldrei að kaupa hann og það kemur umboðsmanni Martial á óvart.

„Anthony er sannur nútíma framherji sem getur spilað hlutverk. Greining Wengers á honum kemur mér á óvart, sérstaklega þar sem hann á að hafa fylgst með honum í langan tíma,“ er haft eftir Lamboley á vef Sky Sports.

„Ef greining Wengers á Martial var bara gerð svo hann þurfti ekki að kaupa hann samþykki ég að Martial sé vængmaður. En í fótboltanum eru menn sem fylgjast með leikmönnum og svo menn sem kaupa þá,“ segir Philippe Lamboley.