Ætlar að fylgjast með framgöngu fíknó á þjóðhátíð

Pétur Þorsteinsson, fyrrverandi skólastjóri og formaður Snarrótarinnar, hefur sent út boð þar sem hann auglýsir eftir framburði þeirra sem lenda í viðskiptum við fíkniefnalögregluna á þjóðhátíð í Eyjum.

Sjá: Pétur hefur lengi barist gegn refsistefnu sem framfylgt er í fíkniefnamálum.

Snarrótin, sem eru samtök um borgaraleg réttindi, telur að fjármunum skattgreiðenda sé betur varið með því að allt tiltækt lögreglulið sinni ofbeldisvörnum á hátíðinni, fremur en fórna „dýrmætum kröftum í að hundelta ungt fólk, til þess eins að koma því á sakaskrá fyrir hreinan tittlingaskít,“ eins og það er orðið í áskorun og auglýsingu eftir fréttum, framburði og jafnvel vídeó-klippum. „Við óskum jafnframt eftir fréttum af leitaraðgerðum lögreglunnar á leiðinni til Eyja, alveg sérstaklega ef hún lætur hunda sína þefa af hverjum manni, til dæmis í Landeyjarhöfn, án þess að um nokkurn grun um fíkniefnamisferli sé að ræða.“

Pétur bendir á tölvupóstfang samtakanna í þessu samhengi: snarrotin@snarrotin.is

Eins og fram hefur komið hefur bréf lögreglustjórans í Eyjum, Páleyjar Borgþórsdóttur, þar sem hún krefst þess af viðbragðsaðilum að þeir upplýsi fjölmiðla ekki um kynferðisbrot sem upp kunna að koma á þjóðhátíð, vakið mikla athygli. Á spjallsvæði Snarrótarinnar á Facebook furðar Pétur sig einkum og sér í lagi á þeim viðhorfum sem lýsa sér í orðum sem Páley lét falla í viðtali við DV: „Að mínu mati varðar mál líkt og fíkniefnamál meira við almannahagsmuni. Þó virðast fjölmiðlar fylgja kynferðisbrotum meira eftir og einhver bolti fer að rúlla.“