Delph fer til City um helgina

Miðjumaðurinn Fabien Delph mun að öllu óbreyttu ganga til liðs við Manchester City sem hefur ákveðið að virkja riftunarákvæði í samningi Delph við Aston Villa.

Samkvæmt samningnum er Aston Villa skylt að samþykkja tilboð upp á átta milljónir punda í Delph, sem er 25 ára, en forráðamenn City eru reiðubúnir að greiða uppsett verð.

Delph, sem er orðinn fastamaður í enska landsliðinu, skrifaði undir fjögurra ára samning við Aston Villa í janúar og hét því þá að hann myndi ekki yfirgefa félagið. Þess í stað á hann fyrir höndum erfiða baráttu um sæti í byrjunarliðinu en City er með Yaya Toure, Fernandinho og Fernando í sömu stöðu.

City þarf á leikmönnum sem eru uppaldir í Englandi að halda til að uppfylla slíkan kvóta í leikmannahópi sínum. Enskir leikmenn sem hafa verið keyptir til félagsins síðastliðin ár hafa þó fengið fá tækifæri með liðinu og nægir þar að nefna Scott Sinclair og Jack Rodwell.

Aston Villa hefur þó þegar fundið eftirmann Delph en félagið hefur gengið frá kaupum á Senegalanum Idrissa Gueye frá Lille í Frakklandi.