Rögnunefndin telur Hvassahraun besta kostinn fyrir flugvöll

Starfshópur um flugvallarkosti í höfuðborginni, Rögnunefndin svokallaða, hefur komist að þeirri niðurstöðu að hagkvæmast sé að byggja flugvöll í Hvassahrauni.

Þetta kemur fram í skýrslu nefndarinnar sem kynnt verður á Nauthól klukkan hálfþrjú í dag. Telur nefndin að allir þeir staðir sem nefndir eru í skýrslunni geti rúmað þá starfsemi sem nú er í Vatnsmýrinni. Samantekt á helstu niðurstöðum nefndarinnar má sjá hér að neðan.

Sjá einnig: Lestu skýrsluna í heild sinni

„Þeir geta jafnframt verið varaflugvellir fyrir Keflavíkurflugvöll og öfugt eins og reyndin er með Reykjavíkurflugvöll í dag,“ segir í skýrslunni sem Vísir hefur undir höndum.

Starfshópurinn var settur á laggirnar í október 2013 og hafði það að markmiði að skoða kosti undir flugvöll á höfuðborgarsvæðinu. Nefndin átti að skila skýrslunni fyrir áramót en fékk frest til þess að skila þar til nú í júní.

Sjá einnig: Hvassahraun skoðað undir alþjóðaflugvöll

„Hvassahraun kemur vel út í samanburði við aðra flugvallarkosti þegar litið er til þátta eins og veðurfars, rýmis og hindrana, kostnaðar og umhverfismála. Þá kemur Hvassahraun best út þegar horft er til möguleika flugvallarstæða til að taka við flugumferð eða starfsemi umfram það sem nú er í Vatnsmýri.

Hvassahraun er því að mati stýrihópsins sá flugvallarkostur sem hefur mesta þróunarmöguleika til framtíðar, borið saman við aðra flugvallarkosti. Þó eru ýmis atriði sem skoða þarf betur, þar á meðal mögulegar mótvægisaðgerðir vegna sjúkraflutninga. Við frekari athugun á mögulegum flugvelli í Hvassahrauni verður einnig að taka með í reikninginn nálægð við Keflavíkurflugvöll, svo sem varðandi loftrými, flugferla og rekstur.“

Málefni Reykjavíkurflugvallar bitbein áratugum saman

Nefndin ítrekar mikilvægi þess að allir aðilar í málinu komi að umræðunni um gögn stýrihópsins, umsögn og tilmæli með opnum huga og sanngirni.

„Umhverfið sem þessar tillögur eru settar fram í er að sumu leyti flókið. Málefni Reykjavíkurflugvallar hafa verið bitbein og deilumál árum og áratugum saman.“

Rögnunefndin leggur til að flugvallarskilyrði í Hvassahrauni verði fullkönnuð með nauðsynlegum rannsóknum og að samhliða því verði náð samkomulagi um rekstraröryggi Reykjavíkurflugvallar í Vatnsmýri verði tryggt á meðan nauðsynlegur undirbúningur og eftir atvikum framkvæmdir fara fram.

Hólmsheiði kemur lakast út af þeim stöðum sem skoðaðir voru. Staðirnir auk Hólmsheiðar og Hvassahrauns voru Bessastaðanes og Löngusker.