Meirihluti starfsmanna á hjartaþræðingardeild sagt upp

Meirihluti hjúkrunarfræðinga á hjartaþræðingardeild Landspítalans hefur sagt upp störfum, eftir að Alþingi setti lög á verkföll hjúkrunarfræðinga. Hjartaheill, landssamtök hjartasjúklinga, lýsa yfir þungum áhyggjum af stöðunni sem upp er komin.

Í ályktun frá samtökunum segir að uppsagnir hjúkrunarfræðinga og annarra starfsmanna undanfarna daga muni auka enn á þann vanda sem safnast hafi upp í verkföllunum síðustu vikur. Uppsagnir hjúkrunarfræðinga á hjartaþræðingardeild hafi í för með sér ófyrirséðar afleiðingar fyrir þá lífsnauðsynlegu starfsemi og þá hjartasjúklinga sem þurfi á bráðri aðstoð að halda.

Hjartaheill skora því á samningsaðila beggja vegna borðs að gera allt sem í þeirra valdi stendur til að ná samningum áður en gerðardómur tekur til starfa í þeirri von að hjúkrunarfræðingar og annað starfsfólk spítalans sem nú hafa sagt upp störfum sjái sér fært að draga uppsagnir sínar til baka áður en enn alvarlegra ástand skapast.