Aron um hjólhestaspyrnumarkið: Búinn að æfa þetta fyrir leik

Aron Jóhannsson, landsliðsframherji Bandaríkjanna, segist vera að finna sitt fyrra form eftir erfið meiðsli sem héldu honum frá keppni stóran hluta tímabilsins.

„Þetta hefur verið mjög erfitt tímabil fyrir mig en síðustu 4-5 leikir hafa verið mjög góðir og ég er að komast í mitt besta form,“ sagði Aron í samtali við heimasíðu bandaríska landsliðsins.

Aron spilaði virkilega vel með AZ á lokasprettinum í hollensku úrvalsdeildinni og skoraði fjögur mörk og gaf tvær stoðsendingar í síðustu fjórum leikjum liðsins í deildinni.

AZ vann þessa fjóra síðustu leiki og tryggði sér þar með sæti í Evrópudeildinni á næsta tímabili og slapp um leið við að fara í umspil um Evrópusæti.

„Eftir að við töpuðum fyrir Feyenoord byrjuðum við að búa okkur undir umspilið í huganum,“ sagði Aron en AZ tryggði sér 3. sætið í deildinni með 1-4 sigri á Excelsior í lokaumferðinni þar sem Aron skoraði tvennu og gaf auk þess stoðsendingu.

Aron skoraði fyrsta mark leiksins gegn Excelsior sem var í glæsilegri kantinum, hjólhestaspyrna af bestu gerð.

„Boltinn kom inn í teiginn og skoppaði hátt upp í loftið. Það var snúningur á boltanum svo ég reyndi að lesa hvenær hann myndi detta niður og komst í hann á undan varnarmanninum.

„Boltinn var í fullkominni hæð og ég ákvað bara að nota hjólhestaspyrnu. Ég er mjög ánægður með að þetta hafi heppnast,“ sagði Aron sem æfði hjólhestaspyrnur sérstaklega fyrir leikinn.

„Ég æfði hjólhestaspyrnur tveimur dögum fyrir leikinn og var heppinn að þetta hittist svona á.“

Aron segir að mikill fögnuður hafi brotist út þegar Evrópusætið var í höfn.

„Við fögnuðum eins og við hefðum orðið meistarar. Þetta var frábær tilfinnig í ljósi þess að fyrir nokkrum vikum síðan vorum við vissir um að við værum á leið í umspilið. Það var því frábært að enda tímabilið í 3. sæti,“ sagði framherjinn sem er í bandaríska landsliðshópnum sem mætir Hollandi í Amsterdam 5. júní og Þýskalandi fimm dögum seinna.

Viðtalið í heild sinni má lesa með því að smella hér.