Berlusconi hefur lokið samfélagsþjónustu sinni

Silvio Berlusconi, fyrrverandi forsætisráðherra Ítalíu, hefur lokið þeirri samfélagsþjónustu sem hann þurfti að sinna eftir að hann var dæmdur fyrir skattsvik. Hinn 78 ára Berlusconi hefur eytt fjórum klukkustundum á viku í að aðstoða eldri borgara með elliglöp frá því í maí í fyrra.

„Tíminn sem ég hef eytt með sjúklingunum og starfsfólkinu hefur haft mikil áhrif á mig,“ sagði Berlusconi við blaðamenn við sjúkraheimilið í Mílanó þar sem hann hefur starfað. Hann sagðist ætla að halda áfram að vinna með sjúklingunum í frítíma sínum, að því er fram kemur í frétt BBC.

Berlusconi, sem þrisvar gegndi embætti forsætisráðherra, á þó enn eftir að heyja nokkrar baráttur fyrir dómstólum. Meðal annars gæti komið til þess að aftur verði réttað í máli gegn honum þar sem hann var ákærður fyrir að borga vændiskonu undir lögaldri fyrir kynmök. Hann var sýknaður af ákærunni á sínum tíma.