Di María meiddur og gæti misst af leiknum gegn Gylfa og félögum

Louis van Gaal gæti verið án Ángel di María þegar Manchester United mætir Gylfa Þór Sigurðssyni og félögum í Swansea í ensku úrvalsdeildinni á laugardaginn.

Argentínumaðurinn varð fyrir meiðslum á æfingu United í dag, samkvæmt fréttum breskra fjölmiðla, og þurfti að fara til sjúkraþjálfara til aðhlynningar.

Óttast er að Di María hafi meiðst aftur á mjöðm, en hann var frá vegna mjaðmarmeiðsla um jólin. Þá hefur hann einnig glímt við meiðsli aftan í læri.

Louis van Gaal hefur glímt við mikil meiðslavandræði á tímabilinu, en þessa stundina eru Phil Jones og Michael Carrick einnig frá vegna meiðsla.

Hollendingurinn staðfesti þó í dag að samlandi sinn, framherjinn Robin van Persie, verður klár í slaginn gegn Swansea um helgina.