„Femínistar hata karlmenn“

Mike Buchanan er leiðtogi nýs stjórnmálaflokks í Bretlandi sem kallast Réttlæti fyrir karlmenn og drengi. Flokkurinn hyggst bjóða fram í þingkosningum sem verða í landinu í maí næstkomandi.

 

Buchanan sparaði ekki yfirlýsingarnar í viðtali við blaðið The Independent í gær en hann lét meðal annars hafa eftir sér að femínistar hati menn og sagði að konur hugsuðu um sjálfar sig sem guðlegar verur.

Buchanan sagði sig úr Íhaldsflokknum árið 2009. Femínismi er að hans mati „ógeðslegur“ auk þess sem hann telur að verið sé að afmá föðurhlutverkið úr bresku samfélagi. Það hefur í för með sér að skattfé breskra borgara fer í að greiða niður sæðisbanka fyrir einhleypar konur og lesbíur, að sögn Buchanan.

Aðspurður um hvers vegna hann stofnaði stjórnmálaflokk sagði Buchanan:

„Ríkið er á móti karlmönnum og öll stefnumörkun er rugl. Ég hugsaði með mér: „Hvað gerir maður í lýðræðisríki þegar staðan er svona?“ Jú, þú stofnar stjórnmálaflokk.“

Flokkurinn hyggst bjóða fram í þremur kjördæmum en kjördæmin í bresku þingkosningunum eru öll einmenningskjördæmi.