EM í hættu hjá Wilshere

Líkurnar á því að miðjumaður Arsenal, Jack Wilshere, missi af EM aukast með hverri vikunni.

Þessi meiðslahrjáði 23 ára leikmaður er einu sinni sem oftar fjarverandi vegna meiðsla og það hefur enginn hugmynd um hvenær hann snýr til baka.

Hann hefur ekki spilað fótbolta síðan hann skoraði tvö mörk fyrir enska landsliðið í 3-2 sigri á Slóveníu fyrir hálfu ári síðan.

Wilshere fór í aðgerð í september og þá var sagt að hann yrði klár eftir þrjá mánuði. Ljóst er að það mun ekki ganga eftir þar sem hann er ekki nærri því að vera klár.

Arsene Wenger, stjóri Arsenal, segir að miðjumaðurinn verði ekki tilbúinn fyrr en í fyrsta lagi í febrúar. Er þó engin trygging fyrir því að það gangi eftir. Wenger segir að batinn sé afar hægur.