Markverðirnir í aðalhlutverki í stórslagnum

Manchester United sýndi betri tilþrif í kvöld en á undanförnum vikum er liðið gerði markalaust jafntefli við Chelsea á heimavelli.

Talið hefur verið að starf Louis van Gaal hangi á bláþræði en þrátt fyrir góða spilamennsku í kvöld varð markaleysi liðinu að falli í kvöld eins og svo oft áður á tímabillinu. Bæði lið fengu þó næg tækifæri til að skora.

Markverðirnir David De Gea hjá Manchester United og Thibaut Courtois hjá Chelsea voru í miklu stuði í kvöld og björguðu liði sínu nokkrum sinnum glæsilega í leiknum.

United byrjaði vel í leiknum og Anthony Martial skaut í stöng snemma. Markið virtist liggja í loftinu fyrir heimamenn en eftir að De Gea varði skalla John Terry snemma leiks náðu gestirnir lítið að ógna marki heimamanna.

Chelsea byrjaði þó síðari hálfleikinn af krafti og De Gea varði vel frá þeim Pedro og Cesar Azpilicueta en stuttu síðar kom eitt besta færi leiksin er Ander Herrara kom skoti að marki eftir fyrirgjöf Martial en Courtois varði glæsilega frá honum.

Nemanja Matic skaut svo yfir úr góðu færi fyrir Chelsea og stuttu síðar virtist Willian handleika knöttinn innan teigs en ekkert var dæmt.

Wayne Rooney fékk líka færi til að skora í leiknum en það átti ekki að verða. United spilaði vel í kvöld en mörkin komu ekki.

United er nú með 30 stig og er í sjötta sæti deildarinnar en Chelsea er í fjórtánda sætinu með 20 stig.