Þúsundir Úkraínumanna reyna að komast til Rússlands

Þúsundir Úkraínumanna bíða nú við landamæri Rússlands eftir því að fá að yfirgefa austurhluta landsins en einungis örfáir klukkutímar eru þar til vopnahléinu milli stríðandi fylking í Úkraínu lýkur.

Lítill gangur hefur verið í viðræðunum milli stjórnar Petrós Pórósjenkó forseta Úkraínu og aðskilnaðarsinna og alls er óvíst að samningar náist fyrir klukkan sjö í fyrramálið að staðartíma – en þá lýkur vonahléinu formlega.

Þrátt fyrir það hefur komið til átaka í austurhluta landsins á síðustu dögum. Til að mynda létust að minnsta kosti þrír úkraínskir hermenn slösuðust þegar aðskilnaðarsinnar, hliðhollir Rússum, gerðu atlögu að herstöð í Donetsk í Austur-Úkraínu nú á laugardag.

Bílaröðin við landamæri Úkraínu og Rússland er sögð margra kílómetra löng og bætast flóttamennirnir í hóp þeirra 90 þúsund Úkraínumanna sem leitað hafa hælis hjá risanum í austri.

Rússneskir valdahafar segja flesta þeirra sem flúið hafa ófriðinn heima fyrir einungis ætla að dveljast austan landamæranna um stundarsakir – það er þangað til að ófriðnum lýkur.

Fyrr í dag krafðist Pórósjenkó þess af Rússum að þeir styddu við friðaráætlun hans með „aðgerðum, ekki orðum“. Forsetinn hefur harðlega gagnrýnt stjórnvöld í Moskvu fyrir að aðstoða og vígbúa aðskilnaðarasinna í austurhluta Úkraínu og segir þau í raun vera að há óformlegt stríð gegn landi sínu.