Íslensk stúlka vitni að skotárás í Texas

„Ég var bara alveg frosin, þetta var svo óraunverulegt“ segir Helena Kristín Gunnarsdóttir, 21 árs gamall íþróttafræðinemi í Houston í Texas, um skotárás sem hún varð vitni að inni á skemmtistað aðfaranótt laugardags. Fjórir særðust í árásinni, þar af einn lífshættulega.

„Við vorum á karabískri hátíð í tilefni þjóðhátíðardags Bandaríkjanna. Svo sér vinkona mín mann skammt frá okkur taka upp byssu. Hún greip í mig og við hlupum inn á klósett,“ segir Kristín.

„Klósettið fylltist af fólki. Síðan heyrðum við fjóra skothvelli og öskur fyrir utan. Fólk var rosalega hrætt því það vissi ekki hvort maðurinn kæmi inn á salernið og byrjaði að skjóta. Margir í kringum okkur hringdu í fjölskyldumeðlimi.“

Helena segir tímann hafa liðið hægt inni á salerninu. „Við vorum sennilega þarna í tuttugu til þrjátíu mínútur. En mér leið eins og það hefði verið lengri tími.“

Helena segist ekki vita hvað byssumanninum gekk til en eftir að hafa látið fjögur skot ríða af hvarf hann í mannþröngina. Hann gengur því enn laus en leit lögreglu stendur yfir.

Helena segist ekki vita hvað byssumanninum gekk til en eftir að hafa látið fjögur skot ríða af hvarf hann í mannþröngina. Hann gengur því enn laus en leit lögreglu stendur yfir.

Öryggisgæslan réð ekki við neitt

Yfir fimm þúsund manns voru inni á staðnum en samkvæmt frétt Reuters voru það einungis þrjátíu lögreglumenn á frívakt sem sáu um öryggisgæslu á viðburðinum. Þeir hafi þar að auki allir verið við inngang staðarins en ekki á dansgólfinu þar sem skotárásin átti sér stað.

„Staðurinn var yfirfullur og starfsfólkið réð ekki neitt við neitt. Hlið inn á staðinn brotnaði í troðningnum þegar fólk reyndi að komast inn,“ segir Helena.

Helena bætir við að vinkonurnar hafi reynt að halda ró sinni síðustu daga. „Vinkona mín er frá Púertó Ríkó og hún er mun vanari skotárásum. Þar gerist það iðulega að fólk er skotið að tilefnislausu úti á götu. Mamma hennar hrósaði henni fyrir að bregðast rétt við þegar hún sá byssuna.“