Vilja kanínu burt úr eyra Mandela

Yfirvöld í Suður-Afríku hafa skipað myndhöggvurum að fjarlægja kanínu úr hægra eyra bronsstyttu sem gerð var af Nelson Mandela, fyrrverandi forseta landsins, á dögunum.

Myndhöggvararnir settu kanínuna í eyra styttunnar til þess að undirstrika það hversu nauman tíma þeir fengu til að ljúka verkinu, en orðið „haas“ merkir bæði kanínu og flýti á afríkönsku.

„Okkur finnst þetta óviðeigandi þar sem Nelson Mandela var aldrei með kanínu í eyranu,“ segir Mogomotsi Mogodiri, talsmaður lista- og menningarmálaráðuneytis Suður-Afríku í samtali við BBC. „Við viljum að fólk líti á styttuna sem vonartákn, en ekki eitthvað á borð við kanínu.“

Styttan er níu metra há og var afhjúpuð þann 16. desember, degi eftir að Mandela var borinn til grafar. Hún stendur í garði stjórnarráðs Suður-Afríku í höfuðborginni Pretoríu.

Mogodiri segir myndhöggvarana hafa beðist afsökunar á uppátækinu og nú eru uppi umræður um hvenær hægt verður að fjarlægja kanínuna. „Yfirvöld vilja hana burt sem fyrst til þess að endurheimta virðuleika styttunnar,“ segir hann.