Hæsta fjall Svíþjóðar minnkar enn

Syðri tindur Kebnekaise, hæsta fjalls Svíþjóðar, mældist 2097,5 metrar á hæð í árlegri mælingu og skilur nú aðeins 70 sentimetrar á syðri og nyrðri tind fjallsins.

Sumarið í norðurhluta Svíþjóðar hefur verið hlýtt og hafa jöklar bráðnað hratt. Þetta á einnig við um 40 metra þykkan jökulinn á hæsta tindi Svíþjóðar, suðurtindi Kebnekaise.

Syðri tindurinn er lítill jökull og mun snjór komandi vetrar hækka hann á ný, en ef næsta sumar verður aftur hlýtt er ekki útilokað að nyrðri tindurinn, sem ekki er jökull, verði þá orðinn hæsti tindur landsins.

Fjöldi manns leggja leið sína á syðri tindinn á ári hverju og því kann að styttast í að umferð um fjallið breytist á komandi árum. „Þar sem nyrðri tindurinn er umtalsvert erfiðari uppgöngu er þetta áskorun fyrir ferðamennsku á Kebnekaise,“ segir Gunhild Rosqvist, forstöðumaður rannsóknarstöðvarinnar í Tarfala í samtali við Dagens Nyheter.



Syðri tindurinn hefur minnkað um að meðaltali einn metra á ári síðustu fimmtán árin.

Hvannadalshnúkur er hæsti tindur Íslands og mælist 2.110 metra á hæð.