Gerrard og Lampard messuðu yfir enska hópnum

Steven Gerrard, fyrirliði enska landsliðsins í fótbolta, og Frank Lampard, varafyrirliði, héldu eldmessu yfir enska hópnum, bæði leikmönnum og starfsliði, á sunnudagskvöldið.

England tapaði fyrsta leiknum sínum á HM gegn Ítalíu á laugardagskvöldið en þar skoraði Mario Balotelli sigurmarkið í seinni hálfleik.

Roy Hodgson, þjálfari Englands, bað sína þrautreyndu fyrirliða að útskýra fyrir öllum hvernig staðan væri en þeir hafa marga fjöruna sopið og spilað saman á sex stórmótum.

„Þetta átti ekki að hræða strákana heldur bara vekja alla - starfsliðið og leikmennina,“ sagði Gerrard í gærkvöldi.

„Ég þekki það vel hvernig það er að detta út á stórmótum. Ég veit um hvað málið snýst og ég vil ekki finna fyrir þeirri tilfinningu á föstudagsmorgun.“

England mætir Úrúgvæ í annarri umferð riðlakeppninnar í kvöld klukkan 19.00 en tap þýðir að England er úr leik. Með jafntefli þurfa Englendingar að treysta á önnur úrslit í lokaumferðinni og jafnframt vinna Kostaríka þannig sigur er þýðingarmikill.

„Þetta er raunveruleiki okkar. Við þurfum að vera algjörlega einbeittir og standa okkur bæði sem einstaklingar og lið á fimmtudaginn. Annars verður sumarið ömurlegt og langt,“ sagði Steven Gerrard.