Forsætisráðherra Frakklands biðst lausnar

Manuel Valls, forsætisráðherra Frakklands, hefur beðist lausnar fyrir sig og sína ríkisstjórn. Francois Hollande Frakklandsforseti hefur beðið Valls um að mynda nýja ríkisstjórn.

Stjórnin hefur verið harðlega gagnrýnd fyrir slælega frammistöðu í efnahagsmálum síðustu misserin og kornið sem fyllti mælinn var þegar ráðherra efnahagsmála, Arnoud Montebourg, bættist í hóp gagnrýnenda.

Montebourg gagnrýndi niðurskurðaraðgerðir ríkisstjórnarinnar og segir hann kominn tíma til að breyta um kúrs. Í frétt BBC kemur fram að Montebourg segi nóg komið af aðhaldsaðgerðum sem væru runnar undan rifjum þýskra stjórnvalda. Fleiri ráðherrar í ríkisstjórninni hafa tekið undir gagnrýnina og því ákvað Valls að segja af sér.