Segja stöðvun gjaldheimtu vera óskynsamlega og ferðaþjónustunni í óhag

Stjórn Landeiganda Reykjahlíðar segir að lögbann sýslumannsins á Húsavík og stöðvun á gjaldheimtu austan Námafjalls og við Leirhnjúk í kjölfarið sé bæði íslenskri náttúru og ferðaþjónustu landsmanna í óhag og því óskynsamleg.

Þetta kemur fram í tilkynningu frá félaginu í dag. Í tilkynningunni segir stjórnin einnig að við niðurstöðuna verði ekki unað til lengdar og að „það mun koma betur og betur í ljós strax í sumar“ eins og þar stendur.

Stjórn félagsins segir rétt að halda til að haga að „sýslumaður setti ekki lögbann á gjaldheimtuna sem slíka heldur tók hann undir það sjónarmið gerðarbeiðenda (sem eru líkt og gerðarþolandi meðal landeigenda í Reykjahlíð) að gjaldheimta á sameiginlegu landi („sameignarsvæðum“ allra landeigenda) „muni takmarka heimildir gerðarbeiðenda til nota, ráðstöfunar og umferðar á sameignarlandi þeirra.“



Í yfirlýsingunni segir að stjórn Landeigenda Reykjahlíðar ehf. muni til skamms tíma:

• mælast nú eindregið til þess að stjórnendur ferðaþjónustufyrirtækja og leiðsögumenn gangi í lið með viðkvæmri náttúrunni og fari ekki með hópa ferðamanna inn á þessi landssvæði.
• draga strax úr átroðningi og áníðslu landsins. Annars er óhjákvæmilegt að loka þessum svæðum alveg.

Rökin segir stjórnin vera eftirfarandi:

• „Eftirlit á svæðunum lagðist af í dag um leið og gjaldheimtu var hætt.
• Slysahætta eykst að sama skapi, enda hverasvæði í eðli sínu hættusvæði og enn frekar þegar gestafjöldinn er eins og raun ber vitni. Það hafa aldrei fyrr verið jafnmargir á ferð í Mývatnssveit og undanfarnar vikur!
• Engir starfa lengur við að tína rusl á vettvangi og þrífa það sem þrífa þarf.“

Sýslumaður­inn á Húsa­vík féllst á 40 millj­óna trygg­ingu sem kraf­ist var vegna lög­banns gegn gjald­töku af ferðamönn­um við Leir­hnjúk og Náma­skarð í dag og var því hætt að rukka inn á svæðin í dag.