Framsalsferli stúlknanna í Prag hafið

Framsalsbeiðni íslensku stúlknanna sem afplána fangelsisdóma fyrir kókaínsmygl í Tékklandi var send innanríkisráðuneyti Tékklands í dag. Búist er við að vinnsla á beiðninni geti tekið allt að átta mánuði, en formlegt framsalsferli hefst í næstu viku. Þórir Gunnarsson, ræðismaður Tékklands, segist þó vongóður.

„Þær eru komnar í annað fangelsi, um 160 km frá Prag og byrjaðar að vinna í súkkulaðiverksmiðju. Ég talaði við lögmann þeirra í dag og þær hafa það ljómandi fínt og eru ánægðar,“ segir Þórir.

Aðalsteina Kjartansdóttir og Gunnhildur Gunnarsdóttir voru handteknar á Vaclav Havel-flugvellinum í Prag, höfuðborg Tékklands 9. nóvember 2012, en þá voru þær átján ára gamlar. Í fórum þeirra fundust þrjú kíló af kókaíni, sem eru um sextíu þúsund söluskammtar samkvæmt tékkneskum dómstólum. Þær höfðu flogið til Prag frá Sao Paulo í Brasilíu, þar sem þær samþykktu að gerast burðardýr. Fíkniefnin voru afar haganlega falin í farangurstösku stúlknanna. Upphaflega stóð til að þær gleyptu fíkniefnin og smygluðu þeim milli landa innvortis.

Viðurlög við fíkniefnasmygli eru afar hörð í Tékklandi og voru Aðalsteina og Gunnhildur dæmdar í sjö og sjö og hálfs árs fangelsi í nóvember á síðasta ári. Í febrúar mildaði áfrýjunardómstóll refsinguna niður í fjögur og hálft ár. Fram að því höfðu stúlkurnar setið inni í sitthvoru fangelsinu í Prag, en eftir að dómarnir voru mildaðir voru þær báðar fluttar í Swětla-fangelsið, sem er í um 160 kílómetra fjarlægð frá höfuðborginni.

Beiðnin er afgreidd í samvinnu við lögreglu og fangelsismálastofnun. Ef allt gengur upp eru stúlkurnar því á leið heim á næstu mánuðum.

Eins og fyrr segir eru stúlkurnar í sama fangelsinu og fengu nýlega vinnu í súkkulaðiverksmiðju þar sem þær vinna á sömu vöktum. „Þær eru bara þokkalega sáttar og það er jákvætt að þetta ferli skuli vera hafið,“ segir Þórir að lokum.