Ég elska karlmann - hann heitir Eiður Smári

Chris Manning, stuðningsmaður enska B-deildarliðsins Bolton, er gríðarlegur aðdáandi Eiðs Smára Guðjohnsen og hann dreymir um að fá hann aftur til liðs við sitt félag.

Eiður hefur æft með Bolton undanfarna daga og spilaði æfingaleik fyrir luktum dyrum í gærdag. Hann hefur heillað leikmenn Bolton á æfingum, en Eiður Smári heillaði Manning upp úr skónum þegar hann spilaði síðast með Bolton 1999-2000.

„Ég þori alveg að segja, að ég er ástfanginn af karlmanni. Þetta kemur konunni minni kannski á óvart, en kannski ekki. Þetta kemur vinum mínum og fjölskyldu kannski á óvart, en kannski ekki,“ skrifar Manning í hjartnæmum pistli á Lion of Vienna Suite, samfélagssíðu Bolton-manna.

„Ég skammast mín ekki fyrir þetta og fel mig ekki  fyrir sannleikanum. Ég elska karlmann. Fallegan mann. Fallegan eldri karlmann. Hann heitir Eiður Smári Guðjohnsen.“

„Hann er orðinn 36 ára gamall og það eru 14 ár síðan hann klæddist síðast Bolton-treyjunni, en ég mun alltaf horfa til baka til þess tíma með bros á vör. Það að við gætum verið að fá hann aftur gleður mig mikið.“

Manning rifjar svo upp feril Eiðs Smára og bendir á að hann hafi spilað fyrir Chelsea, Barcelona, Monaco, Tottenham, Stoke, Fulham, AEK og Cercle Brugge.

En Manning fer svo yfir það hvenær hann sá Eið Smára fyrst í búningi Bolton. Þá var Manning 15 ára gamall.

„Ég keypti miða á bikarleik Bolton gegn Hull og settist í norður-stúkuna þar sem ég hafði setið tvisvar sinnum áður. Í fyrra skiptið á leik í Evrópukeppni félagsliða gegn Lokomotiv Plodiv og hitt skiptið á leiknum þar sem Eiður spilaði sinn fyrsta leik,“ skrifar Manning.

„Ég man eftir litlum og þybbnum ljóshærðum strák koma inn á seint í leiknum og hafa strax áhrif á leikinn með tækni sinni. Ég vissi ekki þá að síðar á árinu 1999 ætti ég eftir að dýrka þennan mann.“

Eftir að fara nánar yfir feril Eiðs Smára hjá Bolton og rifja upp orð leikmanna Bolton um hvernig það hefur verið að æfa með honum skrifar Manning að lokum:

„Ég hef alltaf elskað Eið Guðjohnsen. Hann spilaði kannski bara 54 leiki og skoraði 19 mörk, en hann hafði svo mikil áhrif að hann lifir enn í minningu stuðningsmanna Bolton. Það er ekki hægt að segja um marga fyrrverandi leikmenn liðsins nú til dags.“

Hér má lesa alla lofræðuna.