Fyrsti alþingismaðurinn í sögu keppninnar

Það eru eflaust flestir meðvitaðir um það að hljómsveitin Poppapönk stígur á svið fyrir Íslands hönd í söngvakeppni evrópskra sjónvarpsstöðva í kvöld og freista liðsmenn sveitarinnar þess að komast í úrslitakeppnina sem fram fer á laugardaginn.

Pollapönkarar flytja lagið No Prejudice, sem samið er af Heiðari Erni Kristjánssyni og Haraldi Frey Gíslasyni sem nutu liðsinnis John Grant við enska útgáfu lagsins.

Pollapönkarar hafa vakið mikla athygli í Kaupmannahöfn, og hafa meðal annars komið fram í kjólum og náttsloppum og verið iðnir að koma boðskap sínum á framfæri þar sem þeir segja fordómum stríð á hendur.

„Við höfum verið mjög duglegir að reyna að vera sýnilegir og tala við fólk um boðskap lagsins. Við sjáum að það er farið að skila sér, við erum farnir að fá óvenju mikið af brosum og vinalegum kveðjum. Það er boðskapurinn sem er á oddinum hjá okkur," sagði Óttarr Proppé, alþingismaður og fjólublái polli, í samtali við fréttastofu fyrr í dag.

Tíu atriði komast áfram í kvöld, af þeim 16 sem stíga á svið. Ef litið er til veðbanka eru ekki margir sem spá því að Ísland komist áfram í kvöld. Hafa Pollapönkarar áhyggjur af því?

„Nei, við erum ekki miklir veðmálamenn þannig að við komum ekki til með að græða pening né tapa hvernig sem fer. Við ætlum bara að gera þetta almennilega, standa okkur vel og smita út frá okkur. Miðað við viðtökurnar hingað til held ég að lagið eigi alveg möguleika á að ganga vel."

Óttarr er annar tveggja bakraddasöngvara í laginu, en hann er sem kunnugt er einnig þingmaður á Alþingi Íslendinga.

„Það hefur svona síast út og vakið athygli. Spekingarnir segja að þetta sé í fyrsta sinn sem starfandi alþingismaður taki þátt í Eurovison. Það er einhver dæmi um það að fyrrum Eurovison-stjörnur hafi nýtt frægðina til að gerast alþingismenn síðar. En þetta er nýlunda," segir Óttarr og bætir við að hann myndi klárlega mæla með þátttöku í söngvakeppninni við kollega sína á alþingi.

„Já ekki spurning, þá kannski sérstaklega þá sem halda lagi. Þetta er góður staður til að koma góðum boðskap á framfæri," segir Óttarr Proppé.