Martino líklegastur til að taka við Argentínu

Forseti argentínska knattspyrnusambandsins (AFA), Luis Segura, hefur staðfest að Gerardo „Tata“ Martino sé fyrsti kostur í starf landsliðsþjálfara Argentínu.

Argentína hefur verið án þjálfara eftir að Alejandro Sabella lét af störfum eftir HM í Brasilíu, þar sem Argentínumenn töpuðu í úrslitum fyrir Þjóðverjum.

„Planið er að ráða Martino - plan B er ekki til,“ sagði Segura sem bætti því við að Julio Grondona, forveri hans á forsetastóli AFA, hefði haft samband við Martino áður en hann lést í lok júlí.

Martino, sem hætti sem þjálfari Barcelona eftir síðasta tímabil, er ekki óvanur landsliðsþjálfun, en hann stýrði Paragvæ á árunum 2006-2011. Undir hans stjórn komst Paragvæ í átta-liða úrslit á HM 2010 og í úrslit Suður-Ameríkukeppninnar árið eftir.

Martino lék einn landsleik fyrir Argentínu, árið 1991. Hann spilaði stærstan hluta ferilsins með Newell's Old Boys í heimalandinu.