Samningafundi prófessora frestað í annað sinn

Enn hefur ekkert þokast í viðræðum prófessora við ríkið og stefnir því í að verkfall hefjist í næstu viku. Vonir stóðu til að árangur næðist í viðræðunum í dag en samningafundi dagsins var frestað á síðustu stundu.

Þetta er annað skiptið sem fundinum er frestað en aðilar ætluðu að hittast síðastliðinn föstudag. Samninganefnd ríkisins frestaði einnig þeim fundi. Rúnar Vilhjálmsson, formaður félags prófessora, segist þó binda vonir við að deilan leysist áður en verkfall skellur á.

„Við áttum fund síðastliðinn föstudag en honum var frestað af hálfu viðsemjanda, sem voru okkur nokkur vonbrigði,“ segir hann. Fundinum var svo frestað aftur í morgun.

Rúnar segir að deiluaðilar hafi verið komnir að samkomulagi um helstu atriði. „Við vonum ennþá að það komi ekki til verkfalls í desember. Það er enn tími til stefnu til að ganga frá samningi,“ segir hann.

Yfirgnæfandi meirihluti þeirra sem kusu í atkvæðagreiðslu Félags prófessora við ríkisháskóla um boðun verkfalls samþykktu verkfallsaðgerðir. 80,6 prósent samþykktu verkfall. Ef til verkfalls kemur verður það í miðjum jólaprófum, þann 1.-15. desember, og nær til Háskóla Íslands, Háskólans á Akureyri, Háskólans á Hólum og Landbúnaðarháskólans.