Hasselbaink tekinn við liði í Englandi

Jimmy Floyd Hasselbaink, gamli félagi Eiðs Smára Guðjohnsen í framlínu Chelsea-liðsins, er orðinn knattspyrnustjóri enska D-deildarliðsins Burton Albion.

Hasselbaink gerði garðinn frægan hjá bæði Leeds United og Chelsea en hann endaði knattspynuferil sinn hjá Cardiff árið 2008.

Þetta er ekki fyrsta starfið hjá Hasselbaink því hann var áður þjálfari belgíska b-deildarliðsins Royal Antwerp.

Fyrsti heimaleikurinn hjá Burton Albion undir stjórn Jimmy Floyd Hasselbaink verður á móti Luton Town 22. nóvember.

Jimmy Floyd Hasselbaink og Eiður Smári Guðjohnson voru eitt besta framherjaparið í ensku úrvalsdeildinni á sínum tíma en þau fjögur tímabil sem þeir léku saman skoruðu þeir samtals 109 mörk, Hasselbaink 69 og Eiður Smári 40.