Carrick býst við því að fá nýjan samning

Miðjumaðurinn Michael Carrick er bjartsýnn á að hann fái nýjan samning hjá Man. Utd.

Hann hefur aðeins náð að spila tvo leiki fyrir Louis van Gaal í vetur þar sem hann er búinn að vera meiddur.

„Samningurinn minn klárast næsta sumar og að sjálfsögðu vil ég vera áfram. Ég hef ekkert í önnur hús að venda," sagði Carrick léttur.

Viðræður um nýjan samning eru ekki hafnar en Carrick býst við því að setjast niður með forráðamönnum félagsins eftir áramót.

Leikmaðurinn er orðinn 33 ára gamall og kom til Man. Utd frá Tottenham árið 2006.