Innlent

Íslendingar frekar umburðarlyndir í garð múslima

Bjarki Ármannsson skrifar
Bænastund hjá Félagi múslima á Íslandi.
Bænastund hjá Félagi múslima á Íslandi. Vísir/Vilhelm

„Þó maður sé að fjalla um þessa fordóma eða andúð, þá má ekki gleyma því að það voru, held ég, fleiri sem studdu þetta og voru andsnúnir þessum mótmælum. Það sést til dæmis á örlögum þessara tveggja kvenna sem lentu í ráðhúsinu, það vill enginn snerta þær með töngum.“

Þetta segir Kristján Þór Sigurðsson, doktorsnemi í mannfræði við Háskóla Íslands, sem flytur í vikunni erindi um þá orðræðu sem fram fór hér á landi vegna „moskumálsins“ svokallaða í aðdraganda síðustu sveitarstjórnakosninga. Þá lét Sveinbjörg Birna Sveinbjörnsdóttir, oddviti framboðs Framsóknar og flugvallarvina í Reykjavík, þau orð falla í samtali við Vísi að hún vildi afturkalla lóð sem úthlutuð hafði verið til byggingu mosku fyrir Félag múslima.

Fyrirsjáanleg orðræða
„Erindið fjallar ekki beint um þetta moskumál,“ segir Kristján. „En ég nota það sem svona útgangspunkt til að tala um það sem þetta mál snýst kannski í raun og veru um, það sem kallað er íslamófíbía.“

Kristján eyddi nokkrum árum í að afla sér upplýsinga um samfélag múslima á Íslandi fyrir doktorsritgerð sína en vettvangsrannsókn hans var að mestu lokið þegar ummæli Sveinbjargar rötuðu í fjölmiðla. Þá tók hann saman og skoðaði allar þær upplýsingar sem hann fann á netinu, bæði á fréttamiðlum og samskiptamiðlum, um málið. Hann segir orðræðu Íslendinga um fyrirhugaða byggingu mosku um margt nokkuð fyrirsjáanlega, miðað við svipuð tilfelli úr öðrum löndum.

„Það hefur komið fyrir að þegar svona bygging á að rísa að alls konar öfl fari í gang sem eru á móti þessu og líka margir sem eru með þessu,“ segir Kristján. „Það má ekki gleymast og hér á Íslandi í fyrra held ég að það hafi verið fleiri sem stóðu með byggingu moskunnar en voru á móti henni. Það má ekki gleyma þessu og það má, finnst mér, gefa Íslendingum plús fyrir þetta.“

Fámennur hópur mótmælir
Hann segir „fámennan hóp“ hafa að mestu staðið að því að mótmæla byggingu moskunnar og að sá hópur endurspegli ekki skoðanir almennings. Máli sínu til stuðnings vísar hann í rannsókn sem unnin var af  Bjarneyju Friðriksdóttur, doktorsnema í Evrópulöggjöf nú í ár um hatursorðræðu á netinu. Bjarney komst meðal annars að þeirri niðurstöðu að „fyrir hver fordómafull ummæli þar sem settar eru fram alhæfingar um hópa fólks byggt á staðalmyndum séu að jafnaði 2-3 ummæli þar sem þeim er svarað með rökum og upplýsingum.“

„Nú er ég kannski ekki alveg hlutlaus, ég er búinn að vinna þetta verkefni í nokkur ár og kynnst fólki, en ég er ekkert óánægður með afstöðu Íslendinga í þessu máli. Ekki frekar en til dæmis gagnvart samkynhneigðum. Að mörgu leyti getum við kannski ályktað að Íslendingar séu frekar umburðarlyndir.“

Kristján Þór flytur erindið Moskumálið 2013: Ótti og andúð gegn byggingu mosku á ráðstefnunni Þjóðarspegillinn við Háskóla Íslands nú á föstudag.


Tengdar fréttir

Rúmlega fjörutíu prósent andvíg byggingu mosku

Meirihluti er hlynntur því að Þjóðkirkjan fái að byggja trúarbyggingar á Íslandi en MMR kannaði á dögunum afstöðu Íslendinga til þess að mismunandi trúfélög fái að byggja trúarbyggingar á Íslandi.

Sveinbjörg efast um niðurstöður greiningar á hatursorðræðu

Sveinbjörg Birna Sveinbjörnsdóttir, borgarfulltrúi Framsóknar og flugvallarvina telur að draga megi verulega í efa niðurstöður skýrslu um greiningu hatursorðræðu í ummælakerfum íslenskra netfréttamiðla, sem unnin var fyrir mannréttindaskrifstofu Reykjavíkurborgar. Hún segir vinnubrögðin við rannsóknina ómarktæk.

Líst vel á sameiginlegt guðshús á moskulóð

Frábært að hafa kirkju, mosku og sýnagógu undir sama þaki. Byggingin gæti risið á moskulóðinni, segir Salmann Tamimi, forstöðumaður Félags múslíma. Biskup segir umræðu þörf á samráðsvettvangi trúarbragðanna áður en framkvæmt yrði.

Varaþingmaður Framsóknar hættir vegna moskumálsins

Þorsteinn Magnússon, varaþingmaður Framsóknarflokksins, segir Sigmund Davíð Gunnlaugsson ekki hafa tekið á moskumálinu með nógu afgerandi hætti. "Verða orð hans vart skilin öðruvísi en hann hafi ekkert við umræddan málflutning framboðsins að athuga.“

„Þessi moska kemur aldrei til með að rísa!“

Lögregla hefur lokað Svínshausamálinu. Sverrir Agnarsson telur lögreglu ekki hafa haft nokkurn áhuga á að leysa málið en sá sem gaf sig fram á sínum tíma hótar frekari aðgerðum og segir þungavigtarmenn að baki; lögmenn og lögreglumenn.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.