Innlent

„Þessi moska kemur aldrei til með að rísa!“

Jakob Bjarnar skrifar
Óskar Bjarnason segir mikla þungavigt að baki gerningnum; lögmenn og lögreglumenn. Sverrir Agnarsson telur lögreglu ekki hafa haft nokkurn áhuga á að leysa það en ekki náðist í Stefán Eiríksson.
Óskar Bjarnason segir mikla þungavigt að baki gerningnum; lögmenn og lögreglumenn. Sverrir Agnarsson telur lögreglu ekki hafa haft nokkurn áhuga á að leysa það en ekki náðist í Stefán Eiríksson.

Enginn niðurstaða fékkst í rannsókn lögreglunnar á dreifingu svínshausa á lóð múslima við Sogamýri. Sverrir Agnarsson, formaður Félags múslima á Íslandi, gefur ekkert fyrir rannsóknina. Hann segir þann sem framdi verknaðinn hafa gengist fúslega við honum og sagt að moskan risi aldrei og frekari aðgerða væri að vænta.

Gunnar Hilmarsson, aðalvarðstjóri á lögreglustöðinni við Grensásveg, segir að rannsókn lokið en málið var aldrei sent til ákærusviðs lögreglunnar því enginn botn fékkst í málið.

Þegar málið kom upp steig Óskar Bjarnason fram og játaði á sig verknaðinn í viðtali við Vísi. Hann sagðist hafa verið í félagi með þremur öðrum og að markmið þeirra hafi verið að mótmæla fyrirhugaðri byggingu mosku á lóðinni.
Gunnar segir, í samtali við Fréttablaðið, að þarna hafi nú bara einhver verið á ferð sem vildi vekja á sér athygli. „Ekkert liggur fyrir um það hver þarna var að verki,“ segir Gunnar.

Vísir ræddi í gær við Salman Tamimi, trúarleiðtoga múslima, og hann taldi einsýnt að lögreglan væri að draga lappirnar í málinu, en þá var ekkert að frétta. Á sínum tíma hentu starfsmenn Reykjavíkurborgar hentu sönnunargögnum í málinu að viðstaddri lögreglu. Sverrir Agnarson furðar sig á niðurstöðunni.

„Æji, mér finnst hún hálf hlægileg. Ég næ ekki af hverju þeir geta ekki rannsakað málið. Þeir klúðruðu sönnunargögnunum og svo er engin spurning um tilganginn með þessu. Það var ekkert að vekja á sér athygli,“ segir Sverrir. Hann segir svo frá að hann hafi verið í viðtali á Útvarpi Sögu ásamt téðum Óskari. „Sem stóð fyrir þessu. Þar játaði hann þetta alveg og hótaði fleiri aðgerðum. Hann sagði við mig: Þessi moska kemur aldrei til með að rísa! Hvað sem það þýðir?“

Þannig að honum hefur verið full alvara og hann gekkst við þessu í þín eyru?

„Alveg hreint. Og hann sagði að það væru miklir þungavigtarmenn á bak við þetta sem væru bæði lögfræðingar og lögreglumenn.“

Má þá segja að lögreglan hafi sópað þessu undir teppið?

„Ég held að þeir hafi ekki haft neinn sérstakan áhuga á að leysa þetta mál eða litið á þetta sem neinn hatursáróður, hatursglæp eða hvað má kalla þetta,“ segir Sverrir.

Ekki tókst að ná tali af Stefáni Eiríkssyni lögreglustjóra við vinnslu þessarar fréttar.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.