Welbeck verður lykilmaður hjá Englandi og Arsenal

Jack Wilshere, miðjumaður Arsenal og enska landsliðsins, segir að Danny Welbeck, samherji hans hjá Arsenal og Englandi, sé á góðri leið að verða lykilmaður hjá báðum liðum.

Welbeck skoraði eitt mark í 5-0 sigri Englands á San Marinó á fimmtudaginn og tvö mörk gegn Sviss fyrr í mánuðinum.

„Ég sagði áður en hann skrifaði undir hjá Arsenal að hann gæti spilað fremstur og að hann myndi skora mörk. Hann sýndi það í landsleiknum gegn Sviss og hefur verið frábær hjá Arsenal," sagði Wilshere og bætti við:

„Aðalmálið er sjálfstraustið hans. Hann fékk ekki tækifæri til að spila sem fremsti maður hjá United og að vera aðalmaðurinn; sá sem skorar mörkin."

„Hann hefur fengið tækifæri hjá Arsenal og hann er að sýna öllum hvað í honum býr. Honum líkar við pressuna að vera aðalmaðurinn og hugarfar hans er frábært," sagði Wilshere að lokum.

England mætir Eistlandi í dag klukkan 16:00 og er leikurinn í beinni útsendingu á Stöð 2 Sport 2.