Ummælin lýsa ekki persónulegri skoðun

„Þegar ég féllst á þessa skipun þá var ég búinn að steingleyma þessum umræðuþætti. En ég tel sjálfur að það komi ekkert fram á þessum ummælum sem á nokkurn hátt eigi að koma í veg fyrir að ég fjalli um endurupptökubeiðnina,“ segir Davíð Þór Björgvinsson, settur ríkissaksóknari í Guðmundar- og Geirfinnsmálunum.

Davíð Þór sagði fyrir 17 árum síðan í umræðuþættinum Undir sönnunarbyrði að málið byggist nær eingöngu á játningum sakborninga og því yrði erfitt fyrir að hafna endurupptöku, ef ný gögn sýndu fram á brotalamir við rannsókn málsins. Efnislega vill hann ekki tjá sig um málið og fullyrðir ekki hvort álit þessa efnis að játningar sakborningar séu falskar dugi til endurupptöku.

„Það væri mjög óskynsamlegt að tjá mig um málið á þessum tímapunkti þar sem ég hef ekki fengið gögnin í hendurnar,“ segir Davíð í samtali við Vísi.

En þessi ummæli sem þú lést falla árið 1997. Lýsa þau þinni skoðun í dag? Hefði ekki verið rétt að upplýsa um þessi ummæli áður en þú tókst þetta að þér?

„En ég hef ekki látið nein skýr ummæli falla sem lýsir mínum skoðunum og þetta var ekki mín persónulega skoðun. Ég kom í þáttinn sem háskólakennari í fræðsluskyni án nokkurra tengsla við málið. Ég hef engu verið að leyna enda liggur þetta allt fyrir,“ segir Davíð.

Sigríður Friðjónsdóttir ríkissaksóknari lýsti sig í vikunni vanhæfa til þess að fjalla um endurupptökubeiðni Erlu Bolladóttur og Guðjóns Skarphéðinssonar í bréfi sem hún sendi dómsmálaráðherra. Ástæðan er sú að Örn Höskuldsson, sem var einn af rannsakendum málsins, er kvæntur móðursystur Sigríðar. Davíð Þór var því settur saksóknari í málinu.

Davíð er bjartsýnn á framhaldið og þakklátur að hafa verið falið þetta verkefni. „Ég er þakklátur fyrir það traust sem mér er sýnt og að mér skuli hafa verið falið þetta verkefni. Það er mikið og stórt og nú ríður á mestu að fá frið til að sinna því,“ segir Davíð að lokum.