119 karlar og 15 konur vilja búa með forsetahjónunum

Á annað hundrað einstaklingar vilja búa með forsetahjónunum Ólafi Ragnari Grímssyni og Dorrit Moussaieff. Fólkið sótti um starf umsjónarmanns á forsetaheimilinu. Samkvæmt upplýsingum frá skrifstofu forseta sóttu 134 um starfið; 119 karlar og 15 konur.

„Gert er ráð fyrir að gengið verði frá ráðningu í starfið í næsta mánuði,“ segir Árni Sigurjónsson, skrifstofustjóri forsetaembættisins, í skriflegu svari við fyrirspurn Vísis. Enginn hefur enn verið boðaður í viðtal en enn er unnið að úrvinnslu umsóknanna.

Ætlast er til að sá sem ráðinn verður í starfið hafi búsetu á Bessastöðum.

Í auglýsingunni fyrir starfið kom fram að krafa væri gerð um reynslu og menntun sem nýtist í starfinu, færni í mannlegum samskiptum og gott vald á enskri tungu. Starfið felst í umsjón fasteigna á svæðinu og akstri fyrir embættið.