Brot á vopnahléi í Úkraínu

Ásakanir ganga á báða bóga milli úkraínska hersins og aðskilnaðarsinna í austurhluta Úkraínu um brot á vopnahléi sem tók gildi aðfaranótt laugardags. Lítið dró til tíðinda í gær en í nótt heyrðust sprengingar víða um brogina Mariupol og staðfest hefur verið að ein kona hafi látið lífið í sprengingunum. Snemma í morgun heyrðust svo sprengingar frá flugvellinum í Donetsk.

Rússar halda sem fyrr áfram að neita liðveislu sinni við uppreisnarmenn í  Úkraínu, sem berjast fyrir aðskilnaði austurhluta landsins  og stofnun sjálfstæðs ríkis á svæðinu.

Evrópusambandið hefur ákveðið að herða refsiaðgerðir sínar gegn Rússum. Aðgerðirnar eiga að taka gildi á morgun, nema Rússar samþykki að draga herlið sitt tilbaka frá austurhluta Úkraínu. Refsiaðgerðinrar fela meðal annars í sér að ferðafrelsi valdamanna verður takmarkað enn frekar og eignir þeirra frystar. Þá verður aðgengi Rússa að olíumörkuðum verður skert sem og að vopnaframleiðendum. Stjórnvöld í Rússlandi segjast munu bregðast við með afgerandi hætti verði frekari viðskiptaþvinganir Evrópusambandsríkja samþykktar.

2.600 manns hafa látist í átökunum í Úkraínu síðan í apríl.