Úkraínumenn skoða rússnesku hjálpargögnin

Úkraínsk yfirvöld rannsaka nú hjálpargögnin sem Rússar hafa flutt að landamærum ríkjanna og send voru með þrjú hundruð vöruflutningabílum fyrr í vikunni.

Í frétt BBC segir að hjálpargögnin séu ætluð fólki í borgum í bæjum í austurhluta Úkraínu sem eru undir stjórn aðskilnaðarsinna á bandi Rússlandsstjórnar.

Úkraínsk stjórnvöld óttast að vopn kunni að leynast meðal hjálpargagnanna, en Rússar hafa hafnað öllum slíkum ásökunum.

Blaðamenn Guardian sögðu frá því á Twitter í gær að þeir hafi séð fjölda brynvarða bíla rússneska hersins halda yfir landamærin til Úkraínu.

Um tvö þúsund manns hafa látist í átökum úkraínska stjórnarhersins og aðskilnaðarsinna á bandi Rússa síðustu mánuði.

So @RolandOliphant and I just saw a column of APCs and vehicles with official Russian military plates cross border into Ukraine.

— Shaun Walker (@shaunwalker7) August 14, 2014