Enski boltinn: Sumarið hjá Tottenham

Mauricio Pochettino, nýr þjálfari Tottenham, hefur verið rólegur á leikmannamarkaðinum í sumar.

Aðeins þrír leikmenn eru komnir til Tottenham, sem þykir lítið á þeim bænum. Markvörðurinn Michel Vorm og vinstri bakvörðurinn Ben Davies komu frá Swansea og enski unglingalandsliðsmaðurinn Eric Dier frá Sporting Lissabon.

Að sama skapi hefur Spurs misst lítið, en liðið í dag er mjög svipað því sem lenti 6. sæti ensku úrvalsdeildarinnar í fyrra. Gylfi Þór Sigurðsson er farinn til Swansea eins og frægt er, og Jake Livermore var seldur til Hull þar sem hann lék sem lánsmaður á síðasta tímabili.

Pochettino vonast væntanlega til þess að leikmennirnir sem Andre-Villas Boas keypti fyrir peninginn sem fékkst fyrir söluna á Gareth Bale komi til og standi sig betur en í fyrra.

Southampton-mennirnir Jay Rodriguez og Morgan Schneiderlin hafa verið orðaðir við Tottenham, líkt og Wilfried Bony, en ólíklegt verður að teljast að Swansea selji Spurs þriðja leikmanninn í sumar.

Þónokkrir leikmenn hafa verið orðaðir frá félaginu, þá helst Michael Dawson, Etienne Capoue, Younes Kaboul og Emmanuel Adebayor.

Komnir:

Ben Davies frá Swansea

Michel Vorm frá Swansea

Eric Dier frá Sporting Lissabon

Farnir:

Jake Livermore til Hull City

Gylfi Þór Sigurðsson til Swansea

Yago Falque til Genoa

Heurelho Gomes til Watford

Cameron Lancaster samningslaus

Kenneth McEvoy til Peterborough United (á láni)

Shaquile Coulthirst til Southend United (á láni)

Jordan Archer til Northampton (á láni)