Hollendingar gramir út í dóttur Pútín

Meint búseta Maríu Pútín, dóttur Vladímírs Pútín Rússlandsforseta, í Hollandi hefur vakið gremju margra Hollendinga sem kenna Rússum um örlög farþegaþotunnar MH17. Tæplega tvö hundruð þeirra farþega sem létu lífið voru hollenskir en margir kenna aðskilnaðarsinnum í austurhluta Úkraínu, sem hliðhollir eru Rússum, um að hafa skotið vélina niður.

Hin 29 ára María er sögð búa í þorpinu Voorschoten í vestanverðu Hollandi ásamt kærasta sínum. Dagblaðið De Telegraaf birti í vikunni mynd af íbúðarblokkinni þar sem þau eiga að búa með frétt þess efnis að Úkraínumenn búsettir í Hollandi hygðust standa fyrir friðsælum mótmælum þar fyrir framan.

Þá lét Pieter Broertjes, borgarstjóri í Hilversum, þau ummæli falla í útvarpsviðtali á miðvikudag að María ætti að vera send úr landi. Hann baðst síðar afsökunar á þessum ummælum á Twitter-síðu sinni en sagði þau vera sprottin úr „vanmáttartilfinningu sem margir ættu að kannast við.“

Ósköp lítið er vitað um Maríu og Jekaterínu, systur hennar. Þeim hefur alla tíð verið haldið úr sviðsljósinu og engar myndir hafa verið teknar af þeim opinberlega frá því að þær voru börn. María hefur þó oft verið sögð í sambandi við hollenska ríkisborgarann Jorrit Faassen en hann hefur gegn stjórnunarstöðum í rússneskum fyrirtækjum á borð við Gazprom. Hann komst í heimspressuna árið 2010 þegar lífverðir rússneska bankamannsins Matvei Urin áttu að hafa gengið í skrokk á honum í tengslum við umferðarágreining í Moskvu.