167 manns veðjuðu á það að Suarez myndi bíta

Úrúgvæmaðurinn Luis Suárez virtist bíta ítalska varnarmanninn Giorgio Chiellini í leik Úrúgvæ og Ítalíu á HM í Brasilíu í gær. Flestir trúðu ekki sínum augum þegar þeir horfðu á sjónvarpsútsendinguna frá leiknum en það voru samt ótrúlega margir sem „sáu" þetta fyrir eins og kemur fram í frétt ESPN.

Betsson-veðmálafyrirtækið bauð nefnilega upp á möguleikann á því að veðja á það að Luis Suárez biti mótherja á HM og það voru alls 167 manns tilbúnir að setja pening á það. Líkurnar voru 175 á móti einum. Betsson hefur aðsetur á Möltu.

Norðmaðurinn Thomas Syverson var í viðtali við ESPN en hann setti 595 krónur íslenskar á það að Suárez biti einhvern á HM. Syverson hefur þegar fengið 104 þúsund krónur íslenskar inn á reikninginn sinn þótt að FIFA sé ekki búið að dæma í málinu.

„Ég setti 32 norskar krónur á þetta bara til gamans," sagði Thomas Syverson við ESPN. Hann frétti af biti Suárez þegar vinur hans sendi honum SMS.