Englendingar mættir til Brasilíu

Enska landsliðið er komið til Brasilíu þar sem liðið mun taka þátt á HM.

Enska liðið flaug til Brasilíu eftir 0-0 jafnteflið gegn Hondúras í gær, en enska liðið mun dveljast á Royal Tulip hótelinu í Ríó de Jainero á meðan mótinu stendur.

Roy Hodgson og lærisveinar hans hafa verið æfingabúðum síðustu vikurnar, fyrst heima á Englandi, svo í Portúgal og undanfarna viku hefur liðið dvalið í Miami. Hodgson segir æfingar hafa gengið vel.

"Undirbúningurinn síðustu þrjár vikurnar hefur gengið frábærlega," sagði Hodgson.

"Hópurinn er að styrkjast, leikmennirnir ná vel saman og við hlökkum til að takast á við verkefnið og höfum trú á okkar getu.

"Boltinn fer fljótlega að rúlla og ég er ánægður með liðsandann og leikmennirnir hafa gert allt sem við höfum óskað af þeim," sagði Hodgson ennfremur.

England hefur leik gegn Ítalíu 14. júní á Arena Amazonia í Manaus. Fimm dögum síðar mætir liðið Úrúgvæ í Sao Paulo og 24. júní leikur England gegn Kosta Ríka í Belo Horizonte.