Sterling sá rautt í Miami

England gerði jafntefli gegn Ekvador í Miami í kvöld þrátt fyrir að hafa hvílt nokkra lykilleikmenn. Leikurinn var hluti af undirbúningi Englands fyrir Heimsmeistaramótið sem hefst í næstu viku.

Enner Valencia kom Ekvador óvænt yfir í upphafi leiks með góðum skalla eftir mistök í varnarlínu enska liðsins en Englendingar voru ekki lengi að svara. Wayne Rooney var þá fyrstur að boltanum eftir að Rickie Lambert átti skot í stöngina og lagði Rooney boltann í autt netið.

Lambert sem gekk nýverið til liðs við Liverpool kom Englendingum yfir í upphafi seinni hálfleiks eftir góðan undirbúning frá Ross Barkley. Ekvador var hinsvegar ekki lengi að svara, Michael Arroyo átti þrumuskot af löngu færi sem Ben Foster réð ekki við í marki Englendinga.

Korteri fyrir leikslok fóru tvö rauð spjöld á loft. Raheem Sterling fór í ljóta tæklingu og fékk réttilega rautt spjald en viðbrögð Antonio Valencia urðu til þess að honum var einnig vísað af velli.

Jafntefli var að lokum staðreynd þrátt fyrir að Englendingar hafi hvílt ýmsa lykilleikmenn. Fínn undirbúningur fyrir enska liðið sem mætir Hondúras í loka undirbúningsleik sínum fyrir HM á laugardaginn.