„Það eina sem við viljum er að fá að lifa saman hér á Íslandi“

„Hún Magga mín er mér allt. Ég vil bara komast aftur til hennar,“ segir Hassan Mahdi, sýrlenskur hælisleitandi sem sendur var úr landi í síðustu viku. Hassan er kvæntur íslenskri konu, Margréti Láru Jónasdóttur. Hassan er nú í Svíþjóð og bíður þess að komast aftur til landsins og fá að vera með konu sinni.

Mál Hassans er sambærilegt máli Izekor Osazee, sem gift er íslenskum manni. Mál hennar vakti mikla athygli á dögunum þegar hún var handtekin á lögreglustöð á Hverfisgötu. Kristín Völundardóttir, forstjóri Útlendingastofnunar, sagði í samtali við RÚV að mál Osazee væri einstakt, ekki hafi áður komið inn á borð Útlendingastofnunar mál þar sem hælisleitandi hafi gifst íslenskum ríkisborgara eftir að hafa fengið synjun um dvalarleyfi hér á landi.

Samkvæmt DV átti að vísa hælisleitanda frá Alsír, sem giftur er íslenskri konu, úr landi í dag en var sú ákvörðun afturkölluð á meðan stefnumótun er sett í málum sem þessum.

Vill fá að lifa óttalausu lífi

Hassan kom til landsins árið 2013, en var stöðvaður í Leifsstöð þar sem hann var með fölsuð persónuskilríki. För hans var heitið til Kanada þar sem hann ætlaði að sækja um hæli sem flóttamaður. Við komuna til Íslands var hann sendur í einangrun í sjö daga og síðar í fjórtán daga fangelsi. Um leið og hann var tekinn höndum á Íslandi sótti hann um hæli hér á landi.

Hassan Mahdi er Síja múslími en þeir hafa orðið fyrir miklum ofsóknum í Sýrlandi. Hann vill af þeim sökum komast frá Sýrlandi þar sem hann getur lifað óttalausu lífi án þess að þurfa að eiga hættu á að sæta ofsóknum daglega vegna trúar sinnar.

„Við giftum okkur þann 21. mars síðastliðinn. Allir pappírar eru í lagi hjá okkur og áður en við giftum okkur fór ég til Svíþjóðar til að ná í vegabréfið hans sem er í gildi. Sakaskráin kom frá Sýrlandi og það er allt eins mikið á hreinu og við getum haft það," segir Margrét Lára Jónasdóttir, eiginkona Hassans.

Engin skýr stefna til

Einum og hálfum mánuði eftir giftingu Hassans og Margrétar Láru var hann sendur úr landi. Margrét Lára segist enn ekki hafa fengið upplýsingar frá Útlendingastofnun um hvenær þau verða sameinuð á ný.

„Ég virðist koma að lokuðum dyrum hvar sem ég kem, það er enginn sem getur að fullnustu aðstoðað okkur. Það eina sem við viljum er að fá að lifa saman hér á Íslandi. Hann er bara nákvæmlega eins og við öll hin og ég sé ekki hvert vandamálið er. Mér finnst vanta skýra stefnu í þessum málum.“

Samkvæmt forstjóra Útlendingastofnunar er engin skrifleg stefna til, en segir að stefna stjórnvalda felist í lögum.