Mótmælt til stuðnings Izekor Osazee

Fámennur hópur fólks kom saman við lögreglustöðina á Hverfisgötu klukkan tólf í dag til stuðnings Izekor Osazee sem handtekin var í gær.

Osazee er hælisleitandi frá Nígeríu sem kom hingað til lands árið 2012. Hún giftist íslenskum manni tólfta apríl síðastliðinn en í síðustu viku var henni tilkynnt að henni yrði vísað úr landi á grundvelli Dyflinnarreglugerðarinnar.

Aðstandendur Osazee stofnuðu í gær vefsíðu þar sem boðað var til mótmælanna.

„Fólk sem stendur upp og lætur í sér heyra í samvinnu við fjölmiðla geta varpað ljósi á svona mál og dregið ranglætið fram í dagsljósið. Það er margt sem þessar stofnanir eru tilbúnar að gera í skjóli nætur en ekki þegar þau vita að það er verið að fylgjast með þeim,“ segir á síðunni.

Gísli Jóhann Grétarsson, eiginmaður Osazee, er þakklátur fyrir veitan stuðning.

„Þetta eru miklu fleiri en ég bjóst við. Ég er svo þakklátur, að fólk sé að koma saman til að veita mér stuðning. Það er ómetanlegt,“ segir Gísli í samtali við Vísi.