Norðmenn draga úr þróunaraðstoð til Úganda

Norska ríkisstjórnin hefur tilkynnt að hún ætlar sér ekki að greiða út 50 milljónir norskra króna, um 950 milljónir íslenskra króna, í þróunaraðstoð til Úganda í mótmælaskyni við ný lög sem herða refsingu við samkynhneigð. 

Á fréttavefnum The Local kemur fram að Norðmenn hafa undanfarin ár greitt um 400 milljónir norskra króna á ári í þróunaraðstoð til Úganda, sem gerir um sjö og hálfan milljarð íslenskra króna. 

Ákvörðun stjórnvalda um að skera niður þróunaraðstoð til ríkisins kemur í kjölfar þeirra tíðinda að Yoweri Museveni, forseti Úganda, samþykkti í gær ný lög sem gera lífstíðarfangelsi að þyngstu refsingu gegn „síendurtekinni samkynhneigð.“ Einnig er með nýju lögunum orðið lögbrot að tilkynna ekki samkynhneigða til lögreglu.

Í frétt The Local kemur fram að Danir ætli sér einnig að draga úr þróunaraðstoð til Úganda um sem nemur rétt rúmlega milljarði íslenskra króna. Líkt og Vísir greindi frá fyrr í dag, hafa nokkrir íslenskir þingmenn lagt fram þverpólítíska tillögu þess efnis að hagræða þróunaraðstoð Íslendinga til Afríkuríkisins. Vilja þeir að framlag til samtaka samkynhneigðra þar í landi verði stóraukið.